बिबट्याचा हल्ला: मसला येथे शेतकऱ्यावर जीवघेणा प्रसंग, उपचारासाठी तातडीने रुग्णालयात दाखल

Spread the love

तुळजापूर (प्रतिनिधी) — तुळजापूर तालुक्यातील मसला येथील एका शेतकऱ्याच्या शेतात सोमवारी दुपारी सुमारास घडलेल्या धक्कादायक घटनेने परिसरात खळबळ उडाली आहे. बाबुराव गायकवाड यांच्या शेतात गवत कापण्यासाठी गेलेल्या निखिल बाबुराव गायकवाड (वय 28) या तरुण शेतकऱ्यावर बिबट्याने हल्ला केला. या हल्ल्यात निखिल गायकवाड हे गंभीर जखमी झाले असून, त्यांच्यावर तातडीने उपजिल्हा रुग्णालय तुळजापूर येथे उपचार सुरू करण्यात आले आहेत.

प्राप्त माहितीनुसार, दुपारी दोनच्या सुमारास निखिल गायकवाड हे शेतात गवत कापत असताना गवतामध्ये दबा धरून बसलेल्या बिबट्याने अचानक त्यांच्या अंगावर झडप घातली. झटापटीदरम्यान निखिल यांनी धाडसाने प्रतिकार केल्याने बिबट्या काही वेळातच पळून गेला. मात्र या हल्ल्यात निखिल यांच्या डाव्या हाताला व पाठीवर गंभीर जखमा झाल्या आहेत.

घटनेची माहिती मिळताच त्यांच्या वडिलांनी तात्काळ त्यांना रुग्णालयात दाखल केलं. सुदैवाने निखिल यांचा जीव वाचला असला, तरी बिबट्या गावाच्या परिसरात फिरत असल्याने स्थानिकांमध्ये भीतीचं वातावरण आहे.

वनविभागाने या घटनेची गंभीर दखल घेऊन परिसरात पथक तैनात करावं व बिबट्याला त्वरित पकडण्यासाठी आवश्यक ती कारवाई करावी, अशी मागणी ग्रामस्थांकडून होत आहे.

(अंतरसंवाद न्यूज )