धाराशिव | प्रतिनिधी
भारतीय राष्ट्रीय काँग्रेसचे लोकप्रिय नेते तथा खासदार राहुल गांधी यांच्या वाढदिवसानिमित्त (दि. 19) भारतीय राष्ट्रीय काँग्रेस, जिल्हा धाराशिव यांच्या वतीने विद्यार्थ्यांच्या शैक्षणिक वाटचालीस प्रोत्साहन देण्यासाठी शालेय साहित्य वाटप कार्यक्रमाचे आयोजन करण्यात आले. नगर परिषद शाळा क्र. 8 व 14, धाराशिव येथे विद्यार्थ्यांना वह्या, पेन तसेच इतर शैक्षणिक साहित्याचे वितरण करण्यात आले.
राहुल गांधी यांच्या वाढदिवसानिमित्त आयोजित या उपक्रमातून सामाजिक बांधिलकी जपत विद्यार्थ्यांना शिक्षणासाठी आवश्यक साहित्य उपलब्ध करून देण्यात आले. या प्रसंगी उपस्थित मान्यवरांनी विद्यार्थ्यांशी संवाद साधून शिक्षणाचे महत्त्व पटवून दिले. विद्यार्थ्यांनी मन लावून शिक्षण घेऊन आपल्या कुटुंबाचे, गावाचे आणि देशाचे नाव उज्ज्वल करावे, असे आवाहनही करण्यात आले.
कार्यक्रमात बोलताना मान्यवरांनी सांगितले की, वाढदिवस साजरा करताना केवळ औपचारिक कार्यक्रम न करता समाजोपयोगी उपक्रम राबविणे ही काळाची गरज आहे. शिक्षण हा समाजाच्या प्रगतीचा पाया असून विद्यार्थ्यांना आवश्यक शैक्षणिक साहित्य उपलब्ध करून देणे हे प्रत्येकाचे सामाजिक कर्तव्य आहे. त्याच भावनेतून हा उपक्रम राबविण्यात आला.
यावेळी राहुल गांधी यांच्या सार्वजनिक जीवनातील कार्याचा आढावा घेण्यात आला. युवक, विद्यार्थी, शेतकरी, कामगार आणि वंचित घटकांच्या प्रश्नांसाठी त्यांनी सातत्याने आवाज उठविल्याचा उल्लेख करण्यात आला. तसेच शिक्षण, सामाजिक न्याय आणि लोकशाही मूल्यांसाठी त्यांचे योगदान अधोरेखित करण्यात आले.
या उपक्रमामुळे विद्यार्थ्यांना प्रत्यक्ष मदत मिळाल्याबद्दल समाधान व्यक्त करण्यात आले. शालेय साहित्य मिळाल्याने विद्यार्थ्यांमध्ये आनंदाचे वातावरण निर्माण झाले असून शाळेच्या वतीने या उपक्रमाचे कौतुक करण्यात आले.
शिक्षण हीच समाज परिवर्तनाची खरी ताकद आहे, या भावनेतून आयोजित करण्यात आलेल्या कार्यक्रमास काँग्रेसचे जिल्हाध्यक्ष उमेश राजे निंबाळकर, प्रशांत पाटील, राजेंद्र शेरखाने, खलील सय्यद, अग्निवेश शिंदे, नगरसेवक अझर पठाण, मेहबूब पटेल, धनंजय राऊत, अंकुश पेठे, अभिषेक बागल, वसंत मडके, बाबा मोमिन, सरफराज काझी, पोपट शिंदे, खालेद पटेल, जावेद काझी, आरेफ मुलाणी, अज्जूभाई, नियामत महदी, मुईब शेख तसेच नगर परिषद शाळा क्र. 8 व 14 चे मुख्याध्यापक नईम सर आणि शिक्षकवृंद उपस्थित होते.
उपस्थितांनी खा.राहुल गांधी यांना वाढदिवसाच्या शुभेच्छा देत त्यांच्या निरोगी व दीर्घायुष्यासाठी सदिच्छा व्यक्त केल्या. तसेच समाजोपयोगी शैक्षणिक उपक्रम राबविल्याबद्दल शिक्षक व विद्यार्थ्यांनी आयोजक धाराशिव जिल्हा काँग्रेस कमिटीचे आभार मानले.