धाराशिवमध्ये उद्यापासून आमरण उपोषण; 140 कोटींच्या रस्त्यांच्या कामांसह कचरा डेपो स्थलांतराची मागणी

Spread the love

धाराशिव : धाराशिव शहरातील मंजूर असलेल्या 140 कोटी रुपयांच्या रस्त्यांच्या कामांची तात्काळ सुरूवात करावी तसेच शहरातील कचरा डेपो स्थलांतरित करावा, या प्रमुख मागण्यांसाठी महाविकास आघाडी धाराशिव शहराच्या वतीने उद्या सोमवार, दि. 28 एप्रिल रोजी दुपारी बरोबर 12 वाजता जिल्हाधिकारी कार्यालयासमोर आमरण उपोषण सुरू करण्यात येणार आहे.

या आंदोलनात शहरातील नागरिकांनी मोठ्या संख्येने सहभागी व्हावे, असे आवाहन महाविकास आघाडी धाराशिव शहराच्या वतीने करण्यात आले आहे. शहरातील विविध मुख्य ठिकाणी यासंदर्भात बॅनरही लावण्यात आले आहेत.

याआधीही धाराशिव शहरातील कचरा डेपो हटवण्यासाठी आंदोलने करण्यात आली होती. तसेच 140 कोटी रुपयांच्या कामांना गती देण्यासाठी निवेदने सादर करण्यात आली आहेत.

शहरातील कचरा डेपोच्या संदर्भात धाराशिवचे जिल्हाधिकारी कीर्ती किरण पुजारी यांनी प्रत्यक्ष भेट देऊन प्रशासनाला उपाययोजना राबविण्याच्या सूचना केल्याची माहिती त्यांनी पत्रकार परिषदेत दिली होती.