🚨 धाराशिव बायपासवर भीषण अपघात – तरुणाचा जागीच मृत्यू, ट्रक चालक ट्रकसह फरार!

धाराशिव (१० ऑगस्ट २०२५) : धाराशिव तालुक्यातील सारोळा बु येथील सिद्धार्थ भालचंद्र कठारे (वय अंदाजे २७) या तरुणाचा धाराशिव शहराजवळील बायपास रोडवर, सिद्धाई मंगल कार्यालयासमोर अपघाती मृत्यू झाला आहे.

सिद्धार्थ हे रिपब्लिकन पार्टी ऑफ इंडिया (रिपाइं) धाराशिव तालुका अध्यक्ष भालचंद्र कठारे यांचे पुत्र होते. मिळालेल्या प्राथमिक माहितीनुसार, ट्रक चालकाने दिलेल्या जोरदार धडकेत हा अपघात घडला असून, अपघातानंतर ट्रक चालक ट्रक घेऊन घटनास्थळावरून फरार झाल्याची माहिती आहे.

घटनास्थळी अनेक दिवसांपासून सर्व्हिस रोडचे काम सुरू असून, अर्धवट कामामुळे रस्त्यावर मोठ्या प्रमाणात चढउतार निर्माण झाले आहेत. हे चढउतार प्रत्यक्षात खड्ड्यांसारखे दिसत असून, वाहनचालक त्यांना टाळण्याच्या प्रयत्नात वाहनांचे नियंत्रण गमावतात. अनेक वाहने एकाच ठिकाणी वळवली जात असल्याने रस्त्यावरील खड्ड्यांचा आकार वाढल्याचे चित्र स्पष्ट आहे.

या घटनेनंतर परिसरातील नागरिकांनी रस्त्यावरील धोकादायक परिस्थितीवर तातडीने उपाययोजना करण्याची आणि अपघाताला कारणीभूत ठरलेल्या ट्रक चालकावर योग्य ती कारवाई करण्याची मागणी केली आहे.