धाराशिव ता. 21: एमआयडीसी येथील भूखंडाचे दर कमी करु तसेच शिराढोण येथे एमआयडीसी साठी गायरान जमीन उपलब्ध करण्यासह अनेक प्रलंबित प्रश्न सोडविण्याचे आश्वासन राज्याचे उद्योग मंत्री उदय सामंत यांनी दिल्याचे आमदार कैलास पाटील यांनी सांगितलं. उद्योगमंत्री यांच्या उपस्थितीत धाराशिव जिल्ह्यातील एमआयडीसीच्या प्रलंबित विषयाबाबत मंत्रालयात बैठकीचे आयोजन करण्यात आले होते.. या बैठकीस उपस्थित राहून अनेक महत्वाच्या मुद्द्यावर चर्चा केल्याची माहिती आमदार पाटील यांनी दिली.
यावेळी वडगाव व कौडगाव एमआयडीसीतील भूखंडाच्या किमती कमी करण्याचा मुद्दा उपस्थित केला तेव्हा यावर मंत्री सामंत यांनी सकारात्मकता दाखवत भूखंडाच्या किमती कमी करण्यासाठी नवीन धोरण आखण्यात येईल असे सांगितले..
तर वडगाव एमआयडीसीत अनेक शेतकऱ्यांचे क्षेत्र वगळण्यात आले आहे, ते क्षेत्रही एमआयडीसीत समाविष्ट करावे अशी मागणी पाटील यांनी श्री. सामंत यांच्याकडे केली. यावर पुनर्विचार करण्यात येईल असे त्यानी सांगितले. शिराढोण येथे एमआयडीसीची निर्मिती करण्यासाठी तेथील गायरान जमीन हस्तांतरित करून उद्योग विभागाकडे वर्ग करण्यासाठी प्रस्ताव सादर करण्याचे आदेश जिल्हाधिकारी यांना देण्यात आले आहेत. कौडगाव एमआयडीसीमध्ये टेक्सटाइल पार्क उभारण्याची फक्त घोषणा झाली आहे.घोषणेच्या पुढे काहीही झालेले नसल्याचे यावेळी मंत्री यांच्या पाटील यांनी निदर्शनास आणून दिले.. याबाबत त्यांनी येणाऱ्या काही दिवसात निर्णय घेऊ असे आश्वासन दिले. धाराशिव एमआयडीसीत प्रस्तावित असलेल्या तालुका क्रीडा संकुलाच्या प्रस्तावाला स्थगिती दिल्याची बाबही पाटील यांनी मांडली. काही दिवसात स्थगिती उठविण्यात येईल असे सामंत यांनी आश्वासित केले.. वडगाव एमआयडीसीतील क्षेत्र कमी करण्याबाबतही सकारात्मक निर्णय घेण्यात येईल असे आश्वासित केले..
एमआयडीसी मध्ये उद्योजकांना पूर्वी २० टक्के बांधकाम करण्याची अट होती ती आता ४०% घालण्यात आली आहे, ती अट कमी करून पूर्वी सारखी २०टक्केच करावी अशी मागणी आमदार पाटील यांनी केली. बांधकामाची अट करावी अशी मागणी यावेळी केली. मंत्री महोदयांनी २५ टक्के बांधकामाची अट घालण्यात येईल असे सांगितल्याची माहिती पाटील यावेळी दिली.
याबरोबरच धाराशिव विमानतळ विकसित करण्यासाठी भरीव निधीची तरतूद करण्यात यावी अशीही मागणी केली..
यावेळी माजी मंत्री आमदार अमित देशमुख, आमदार प्रवीण स्वामी यांच्यासह संबंधित विभागाचे सचिव, अधिकारी उपस्थित होते..